Escobar: Shqipëria meriton mbajtjen sa më shpejt të konferencës ndërqeveritare
Deputetja e Partisë Socialiste, Etilda Gjonaj e cila së bashku me një grup deputetësh të Kuvendit të Shqipërisë po zhvillon një vizitë zyrtare në Washington DC, ku sot u pritën në takim në Departamentin Amerikan të Shtetit nga Gabriel Escobar, Zv/ndihmëssekretar në Byronë e Çështjeve Evropiane dhe Euroaziatike.
Lajmin e ka bërë të ditur deputetja Gjonaj në një postim në rrjetet sociale ku thekson se gjatë takimit me Escobar zhvilluan një diskutim të frytshëm për marrëdhëniet e shkëlqyera dypalëshe SHBA-Shqipëri.
“Zhvilluam një diskutim të frytshëm për marrëdhëniet e shkëlqyera dypalëshe SHBA-Shqipëri, si dhe mbështetjen e plotë të SHBA-së për integrimin evropian të Shqipërisë, shprehur publikisht së fundmi edhe në deklaratën e Sekretarit Amerikan të Shtetit Antony Blinken”, shprehet Gjonaj.
“Mirënjohës DASH për mbështetjen politike dhe asistencën teknike nëpërmjet programit #OPDAT për reformën në drejtësi, në shërbim të forcimit të demokracisë dhe shtetit të së drejtës”, tha ajo.
Gjonaj bëri të ditur se, Escobar theksoi rëndësinë e rezultateve të reformave të ndërmarra në dhe siguroi mbështetjen e DASH për zbatimin në vijim të reformës në drejtësi.
Ajo theksoi se, duke e cilësuar Shqipërinë një aleat strategjik i SHBA-së në rajon, Escobar u shpreh se Shqipëria meriton që konferenca e parë ndërqeveritare të mbahet sa më shpejt.
