Federata e Saint Kitts and Nevis do të heq vizat për Kosovën

Në Konsullatën e Përgjithshme të Republikës së Kosovës në Nju Jork u nënshkrua mbrëmë marrëveshja për vendosjen e marrëdhënieve diplomatike, si dhe për lëvizjen pa viza mes Republikës së Kosovës dhe Federatës së Saint Kitts and Nevis.

Marrëveshjet u nënshkruan nga i Ngarkuari me punë në Konsullatën e Përgjithshme në Nju Jork, Ylber Kreziu, dhe përfaqësuesi i Përhershëm i Federatës së Saint Kitts and Nevis në Kombet e Bashkuara, Ambasadori Sam Terrence Condor.

Sipas një komunikate të Ministrisë së Punëve të Jashtme, qeveria e Republikës së Kosovës dhe ajo e Saint Kitts dhe Nevis do të forcojnë marrëdhëniet e miqësisë dhe të bashkëpunimit ndërshtetëror.

Palët janë pajtuar gjithashtu të vazhdohet tutje me intensifikimin e komunikimit politik dhe mbështetjen reciproke në marrëdhëniet e përgjithshme ndërkombëtare.

“Përfaqësuesi i Përhershëm i Federatës së Saint Kitts and Nevis në Kombet e Bashkuara, Sam Terrence Condor, është zotuar se do të ushtrojë ndikimin e tij dhe të qeverisë së shtetit që ai përfaqëson në procesin e lobimit për njohje të reja nga vendet e Karaibeve, si dhe për anëtarësimin e Kosovës në organizata ndërkombëtare.

Pas kësaj marrëveshjeje, arrin në tetëdhjetë numri i shteteve me të cilat, Kosova ka hyrë formalisht në marrëdhënie diplomatike./