FSK-ja zbarkon për operacion humanitar në Shqipëri

Me ftesë të Qeverisë të Republikës së Shqipërisë, përkatësisht ministrisë së Mbrojtjes të Republikës së Shqipërisë, sot, me vendim të ministrit Haki Demolli dhe me urdhër të Komandantit të FSK-së, gjenerallejtënant Kadri Kastrati, një kontingjent i Regjimentit të Mbrojtjes Civile (RMC), të Forcës së Sigurisë së Kosovës është nisur për në Republikën e Shqipërisë, me qëllim të ndihmës në përballimin e situatës së krijuar nga vërshimet e ujërave në disa rrethe atje.

Komandanti i FSK-së, gjeneral Kastrati ka angazhuar Regjimentin e Mbrojtjes Civile, që së pari si ndihmë fillestare të dërgojë një kontingjent në mbështetje të Ushtrisë shqiptare për përballimin e situatës së krijuar pas vërshimeve në disa rrethe të Shqipërisë së mesme dhe të jugut.

Njësiti i FSK-së përbëhet nga pjesëtarë të specializuar dhe të stërvitur në mënyrë të shkëlqyer për Kërkim shpëtim në ujëra, si dhe të pajisur me mjete dhe teknikë speciale për tu përballur me situata të tilla.

Ushtria shqiptare ka marrë të gjitha masat për pritjen e kontingjentit të FSK-së në pikëkalimin në Vërmicë. “Kontingjenti ynë do t’i bashkohet operacionit në fshatin Merkuras të rrethit të Kavajës, dhe aty ku e kërkon nevoja sipas vlerësimeve të ekspertëve ushtarak të Ushtrisë shqiptare”, thuhet në komunikatë.

Kjo është përgjigja fillestare e FSK-së në ndihmë autoriteteve shqiptare, gjithashtu FSK-ja shpreh gatishmërinë që të mbështes edhe më tutje me kontingjente tjera të nevojshme nëse kjo kërkohet nga Qeveria Republikës së Shqipërisë.