Gjermania dhe Italia kundër heqjes së embargos me Iranin

Pas Shteteve të Bashkuara ka reaguar edhe Gjermania e Italia në lidhje me heqjen e embargos për furnizimin e Iranit me sistemin e sofistikuar raketor “S-300” nga Rusia.

Ministri i Jashtëm gjerman, Frank-Walter Steinmeier dhe homologu i tij italian u shprehën të martën kundër vendimit të Rusisë, duke interpretuar se ishte shumë shpejt për të rivendosur lidhjet me Iranin.

“Ne jemi në mes të një procesi dhe është shumë herët për të folur për shpërblime në këtë fazë”, tha Steinmeier para gazetarëve duke iu referuar Iranit.

Presidenti rus, Vladimir Putin i hapi rrugë dërgesave të sistemeve raketore drejt Iranit, ndërsa Moska ka nisur gjithashtu edhe këmbimin e naftës për mallra konsumi me Teheranin, duke treguar kështu vendosmërinë e Kremlinit për të përforcuar marrëdhëniet ekonomike me Republikën Islamike.

Pas veprimeve të fundit të Rusisë i menjëhershëm ishte reagimi i SHBA-ve. Një zëdhënës i Pentagonit e cilësoi lëvizjen si të “padobishme”, duke thënë se shqetësimet lidhur me të po trajtohen përmes “kanaleve të duhura diplomatike”.

Nga ana e saj, Rusia deklaroi se embargoja nuk ishte më e nevojshme pas arritjes së marrëveshjes së përkohshme mbi programin bërthamor të Iranit.