Gjosha: Reformim i thellë i sistemit të drejtësisë për forcimin e shtetit ligjor

Ministrja e Integrimit Europian, Klajda Gjosha deklaroi të martën se “Shqipëria është e vendosur të ecë përpara me reformat që i shërbejnë të ardhmes europiane të vendit”.

Ministrja Gjosha priti në takim një delegacion të Komisionit për Çështjet Europiane të Parlamentit të Danimarkës kryesuar prej kryetares, Mette Gjerskov. Anëtarët e komisionit shoqëroheshin prej Ambasadorit të Danimarkës në Shqipëri, Mads Sandau-Jensen.

Gjosha vlerësoi marrëdhëniet shumë të mira mes dy vendeve dhe mbështetjen që Danimarka i ka dhënë Shqipërisë për procesin e integrimit, veçanërisht statusin e vendit kandidat.

“Fokusi ynë mbetet reformimi i thellë i sistemit të drejtësisë, si parësor për forcimin e shtetit ligjor, luftën kundër korrupsionit, krimit të organizuar dhe për thithjen e më tepër investitorëve të huaj në vend. Por mbi të gjitha për të rikthyer besimin e qytetarëve te sistemi. Qytetarët tanë, janë mbështetësit më të mëdhenj të procesit të integrimit të vendit”, tha Ministrja Gjosha.

Kryetarja e Komisionit për Çështjet Europiane të Parlamentit të Danimarkës, Mette Gjerskov shprehu kënaqësinë për vizitën në Shqipëri dhe vuri në dukje se Danimarka mbështet progresin e Shqipërisë dhe zbatimin e reformave kyçe, duke nënvizuar se kjo rrit besueshmërinë e Shqipërisë pranë partnerëve të saj evropianë.

Minstrja Gjosha informoi delegacionin edhe për punën që po bëhet me 5 prioritetet, duke shprehur angazhimin maksimal të qeverisë për t’i përmbushur sa më shpejt masat e përcaktuara në udhërrëfyes