Liberalët e kryeministrit Golob fitojnë zgjedhjet, por humbasin shumicën në parlament

Kryeministri slloven Robert Golob ka fituar ngushtë zgjedhjet e djeshme parlamentare, por ka humbur shumicën qeverisëse me partnerët e tij të majtë, sipas rezultateve paraprake zyrtare.

Partia e tij liberale, Lëvizja për Liri (GS), siguroi 28,54% të votave dhe 29 mandate, duke dalë forcë e parë në parlament.
Nga ana tjetër, Partia Demokratike Sllovene (SDS) e udhëhequr nga ish-kryeministri Janez Jansa renditet shumë pranë, me 28,17% të votave dhe 28 vende në parlament.

Rezultati i ngushtë e bën të paqartë krijimin e një shumice të qëndrueshme, pasi as blloku i majtë dhe as ai i djathtë nuk arrijnë pragun prej 46 mandatesh në parlamentin me 90 vende.

Pavarësisht kësaj situate, Golob ka deklaruar se do të përpiqet të formojë qeverinë e re, duke theksuar se votuesit i kanë rinovuar mandatin.

Ai pranoi se negociatat për krijimin e koalicionit do të jenë të vështira dhe mund të zgjasin.

Në qeverinë aktuale që prej vitit 2022, Golob ka drejtuar një koalicion me Social Demokratët (SD) dhe partinë e majtë Levica.

Në këto zgjedhje, SD mori 6,7% të votave dhe gjashtë mandate, ndërsa Levica, në aleancë me Partinë e Gjelbër Vesna, siguroi 5,6% dhe pesë vende.

Ndërkohë, Jansa ka sinjalizuar se mund të kontestojë rezultatin e ngushtë, duke kërkuar rinumërim të votave.

Aleati tradicional i SDS-së, partia konservatore Sllovenia e Re (NSi), mori 9,3% të votave dhe nëntë mandate, ndërsa një forcë e re politike,

Demokratët e udhëhequr nga Anze Logar, fitoi 6,7% dhe gjashtë vende.

Fushata zgjedhore u dominua nga akuza për korrupsion, të shoqëruara me publikimin e videove të dyshimta që synonin kampin qeverisës.

Shërbimet inteligjente sllovene konfirmuan pjesërisht raportimet për përfshirje të një agjencie izraelite, ndërsa ministrja e Jashtme Tanja Fajon e cilësoi këtë si një “sulm ndaj demokracisë” në vend. /Ad.Ab./