Gjykata e Lartë, zgjidhet me short trupi gjykues për Mark Frrokun. Sot në mesditë

Është hedhur mëngjesin e së premtes në Gjykatën e Lartë shorti që ka përcaktuar anëtarët e kolegjit penal që do të vlerësojë masën e sigurisë ndaj deputetit Mark Frroku.

Kështu, përmes shortit është zgjedhur relator Artan Broci, ndërsa anëtarë janë: Ardian Nuni, Edmond Islamaj, Guxim Zenelaj dhe Tom Ndreca.

Ndërkohë, seanca ndaj deputetit, i cili u arrestua një ditë më parë pasi Parlamenti i hapi rrugë kërkesës së prokurorisë, është caktuar për sot në mesditë në orën 12:30.

Ndërkohë, përveç akuzës për vrasje që bëhet nga drejtësia e shtetit belg, ndaj Frrokut u ngritën dy ditë më parë edhe dy akuza të reja; njëra për pastrim parash dhe tjetra për refuzim të deklarimit të pasurisë.

Burime nga Prokuroria bëjnë të ditur se bëhet fjalë për një pasuri prej rreth 3 milionë dollarësh e zotit Frroku.

Avokati i deputetit, Saimir Vishaj, i cilësoi absurde akuzat në fjalë, të ngritura pas një kallëzimi të ILDKP-së, si dhe urdhrin për ndalimin e klientit të tij, për të cilin tha se nuk ka asnjë rrezik që të arratiset.