Gjykata Kushtetuese rrëzon kërkesën e PD-së zyrtare për marrëveshjen e emigrantëve me Italinë
Gjykata Kushtetuese ka vendosur këtë të premte të mos legjitimojë kërkesën e bërë nga Partia Demokratike zyrtare, për rrëzimin e marrëveshjes së firmosur mes Shqipërisë dhe Italisë, e cila konsiston në pritjen e rreth 36 mijë emigrantëve në dy qendra pritje që do të ngrihen në Shëngjin dhe Gjadër.
Kushtetuesja në datën 13 dhjetor e ktheu pas kërkesën e PD-së së drejtuar nga Lulzim Basha për mungesë dokumentacioni. Pas një jave kur kërkesa është depozituar e plotë, ajo është rrëzuar dhe nuk do të merret në shqyrtim.
“Mbledhja e Gjyqtarëve arriti në përfundimin se kërkuesja, Partia Demokratike e Shqipërisë, nuk legjitimohet ratione personae t’i drejtohet Gjykatës, pasi nuk provohet interesi i saj i drejtpërdrejtë në çështjen kushtetuese të ngritur, në kuptimin që protokolli të ketë sjellë pasoja negative për statusin ose funksionet e saj , ndaj vendosi moskalimin e çështjes për shqyrtim në seancë plenare, që do të thotë se kërkimet dhe pretendimet e kërkueses nuk mund të shqyrtohen në themelin e tyre“, thuhet në arsyetimin e Kushtetueses.
Kujtojmë se kërkesa e PD-së zyrtare u depozitua nga deputeti Kreshnik Çollaku më 6 dhjetor dhe kërkoi rrëzimin e marrëveshjes me argumentin se është e papajtueshme me nenet 3,4 dhe 7 të Kushtetutës dhe ligjit për marrëveshjet ndërkombëtare të Shqipërisë.
“Shqyrtimi i pajtueshmërisë me Kushtetutën e Shqipërisë të marrëveshjes së nënshkruar nga Këshilli i Ministrave të Republikës së Shqipërisë dhe Qeverisë së Republikës së Italisë. Pezullimin e procedurës parlamentare për. Deklarimin si të papajtueshme me nenet 3, 4, 7 të Kushtetutës dhe Ligjit Nr. 43/2016 “Për marrëveshjet ndërkombëtare në Republikën e Shqipërisë” të marrëveshje së nënshkruar nga Këshilli i Ministrave të Republikës së Shqipërisë dhe Qeverisë së Republikës së Italisë”, thuhej në kërkesën e PD zyrtare.
Ndërkohë, lidhur me marrëveshjen në fjalë, Kushtetuesja ka pranuar të marrë në shqyrtim ankimin e bërë nga 30 deputetë të Partisë Demokratike, mes të cilëve Sali Berisha e Gazment Bardhi, duke i vendosur një bllokadë miratimit të saj në Parlament.
