Gjykata Supreme kërkon të mos nëpërkëmbet gjyqësori
Kryetari i Gjykatës Supreme, Fejzullah Hasani ka mbajtur takim me gjyqtarët e kësaj gjykate, ku është diskutuar për draft ligjin më të ri për Pagat e Zyrtarëve të Lartë, sipas të cilit draft, pozita e kryetarit dhe gjyqtarëve të Supremes është denigruese dhe e papranueshme.
Kryetari Hasani ka theksuar nevojën urgjente të rishikimit të këtij draft ligji, i cili ka shpërfillur pushtetet në Kosovë, duke injoruar Gjykatën Supreme, si pushtet i tretë në vend dhe ekuivalent me pushtetin legjislativ dhe me atë ekzekutiv.
Derisa kryeprokurori i Shtetit, kryesuesi i KGJK-së dhe kryetari i Gjykatës Kushtetuese janë ranguar në një pozitë me kryeministrin dhe kryetarin e Kuvendit, kryetari i Gjykatës Supreme është lënë në rang të dytë me nënkryetarin e Kuvendit zv/kryeministrat dhe Avokatin e Popullit.
Për të pranishmit ishte e çuditshme se si Kryeprokurori i Shtetit që nuk është pjesë e tri pushteteve dhe Kryesuesi i KGJK-së që është zyrtari më i lartë administrativ, rangohen para Kryetarit të Gjykatës Supreme.
“Ndërsa prokurorët e shtetit janë ranguar shumë më lartë se gjyqtarët e Gjykatës Supreme, derisa Kryeprokurori i Prokurorisë së Apelit ka pagë më të lartë se gjyqtarët e Gjykatës Supreme dhe gjithë prokurorët e niveleve ekuivalente me gjykatat, kanë koeficient më të lartë se sa gjyqtarët. Ndaj, kryetari Hasani dhe gjyqtarët e Gjykatës Supreme kanë vendosur që t’i drejtohen Kryeministrit, Presidentes, Ministrisë së Administratës Publike dhe ambasadave në vend, në mënyrë që të mos lejohet nëpërkëmbja e gjyqësorit”, thuhet në komunikatë.
