Gjyqtari Dvorani tërhiqet nga kandidimi për Kushtetuesen, mbetet në krye të KED-it

Gjyqtari i Gjykatës së Lartë, Ardian Dvorani, u tërhoq sot nga kandidimi për anëtar të Gjykatës Kushtetuese, duke argumentuar se e ka për detyrim të drejtojë Këshillin e Emërimeve të Drejtësisë, post që mban aktualisht.

“Kam detyrime kushtetutës për të drejtuar Këshillin e Emërimeve në Drejtësi. Konsideroj si prioritare drejtimin e Këshillit të Emërimeve në Drejtësi. Terheqja është e parevokueshme”, tha Dvorani.

Sipas Kushtetutës, Këshilli i Emërimeve në Drejtësi përbëhet nga 9 anëtarë të përzgjedhur me short, nga radhët e gjyqtarëve dhe prokurorëve, të cilët duhet të plotësojnë një sërë kushtet, dhe që shërbejnë vetëm për një vit pa të drejtë rizgjedhje të njëpasnjëshme.

Ardian Dvorani u rikonfirmua në detyrë nga Komisioni i Pavarur i Kualifikimit duke kaluar filtrin e Vetingut. Ky rikonfirmim u kundërshtua nga PD me pretendimin se anëtarët e Gjykatës së Lartë e kanë mandatin vetëm 9 vjet.