Grabitje në Aeroportin e Rinasit: Policia e Shtetit informon mbi ngjarjen në aeroport

Policia e Shtetit bëri të ditur se “ditën e martë pas mesditës, pranë aeroportit ndërkombëtar “Nënë Tereza”, në Rinas, dyshohet se disa persona ende të paidentifikuar me maska dhe armë, pasi kanë thyer derën e rrethimit që përdoret nga shërbimet zjarrfikëse, kanë grabitur një sasi parash në pistën e avionit dhe janë larguar.

Në ndjekje të tyre janë vënë Forcat e Ndërhyrjes së Shpejtë (FNSH) dhe ato të Policisë Kufitare të Rinasit.

Gjatë ndjekjes në një rrugë dytësore, autorët kanë shkëmbyer zjarr me Policinë, e gjatë këtij shkëmbimi ka humbur jetën njëri prej autorëve të grabitjes. Policia ka gjetur ndërkohë dhe bllokuar një mjet tip furgon.

Forca speciale policore RENEA e FNSH, të ndihmuara nga një helikopter janë ende në ndjekje të autorëve të grabitjes.

Ndërkohë janë angazhuar në një operacion të gjerë edhe forca nga Policia e Tiranës, Lezhës, Dibrës e Durrësit, bën të ditur Policia e Shtetit.