“Haki Çako telefonoi kryeprokurorin Llalla pasi mësoi nga media se ishte kërcënuar”

I ftuar në “Opinion”, gazetari investigativ Artan Hoxha tha se prokurori nuk ja ka referuar Drejtorit të Përgjithshëm të Policisë së Shtetit kërcënimet që ka marrë, e kjo sipas tij, tregon bashkëpunimin e munguar midis dy institucioneve. Hoxha tha se Haki Çako e ka marrë në telefon kryeprokurorin, vetëm pasi është njohur me historinë e kërcënimit, përmes lajmit që doli në media.

Një tjetër problem që gazetari sheh në këtë histori, është fakti që institucionet ligjzbatuese shqiptare nuk janë vënë në dijeni për kërcënimin që ka marrë kryeprokurori Adriatik Llalla. Garancia e jetës së familjes që Llalla ka transferuar në një shtet të Evropës, është dhënë nga partnerët, ndërkohë që sipas Hoxhës, këtë duhet ta bënte shteti shqiptar.

“Është komisioni që merr vendime për të siguruar zyrtarët dhe merr përsipër shpenzimet e jetesës së familjes atje. Ky komision nuk ka marrë asnjë vendim sepse nuk i është kërkuar kjo gjë”, tha gazetari Artan Hoxha.

Ai tha se të njëjtët persona që kanë kërcënuar kryeprokurorin, aludohet se kanë kërcënuar dhe kreun e opozitës, Lulzim Basha.

Nuk është thënë ende asgje zyrtarisht, por në media – informacionet që i referohen burimeve konfidenciale brenda prokurorisë – flasin për një kërcënim që i ka ardhur kryeprokuroprit përmes telefonit. Atij i kërkohet të ndërpresë hetimet ndaj grupit kërcënues, të cilët mbeten ende mister ku i është përmendur edhe familja. Për këtë arsye, Llalla prej muajit qershor kur ka marrë njoftimin, ka larguar familjen e tij, gruan dhe dy fëmijët, drejt Gjermanisë.