Haradinaj: Nuk ka zarf, ka shumicë parlamentare

Lideri i Aleancës për Ardhmërinë e Kosovës, Ramush Haradinaj, njëherësh i nominuar për kryeministër të Kosovës nga LAN, ka theksuar se përderisa për ngërçin flitet në rrugë, familje, kafene…, pse të mos krijohet mundësia të diskutohet edhe në Kuvend.

“Në takimin e sotëm, nuk ka mundur të mos jetë pjesë e bisedës edhe mënyra se si po qeveriset vendi – përkatësisht dëmi që po i shkaktohet vendit. Gjithashtu kemi diskutuar edhe rreth seancës së ardhshme të Kuvendit. Pjesa e parë, dihet, PDK do të konsumojë propozimin e saj për kryetar të Kuvendit. Nëse në seancën që vjen do të veprohet njëjtë si në dy të parat, atëherë do të shohim se cila do të jetë mënyra më e mirë për të reaguar”, ka thënë Haradinaj.

Ai gjithashtu ka vlerësuar se Kushtetuesja nuk i obligon deputetët se si të votojnë.

“Bëhet fjalë për një vend dhe një popull që e ka pranuar demokracinë, që e ka pranuar parlamentarizmin. Shumica është në parlament – parlamenti duhet të gjejë zgjidhjen”, ka vlerësuar Haradinaj.

Duke u ndërlidhur me mundësinë e ndikimeve të jashtme në zgjidhjen e ngërçit, Haradinaj ka shtuar se “nuk ka zarf, ka shumicë parlamentare”.