Haradinaj: Presidentja ka afat deri në fillim të javës së ardhshme
Lideri i Aleancës për Ardhmërinë e Kosovës, Ramush Haradinaj, ka thënë se edhe Blloku VLAN do të bëjë të njëjtën gjë që e kanë bërë komunitetet pakicë në Kosovë.
Haradinaj ka thënë se Blloku VLAN do t’i drejtohet presidentes së vendit, Atifete Jahjaga, duke kërkuar nga ajo që të dërgojë për interpretim në Gjykatën Kushtetuese, pikën 127 të aktvendimit të kësaj gjykate.
“Kërkojmë që presidentja të kërkojë interpretimin e pikës 127 në Gjykatën Kushtetuese. Nëse presidentja nuk merr ndonjë hap në këtë drejtim, në fillim të javës së ardhshme ne do të vazhdojmë me hapat tjerë”, ka thënë Haradinaj.
Pas takimit me përfaqësues të VLAN, Haradinaj nuk ka dashur shumë t’i interpretojë deklaratat e Albin Kurtit, përkatësisht se kush është “hajn i ligës së parë dhe kush i ligës së dytë”.
“Ato deklarata nuk i kemi trajtu, kemi nisur një projekt më të madh. Fenomeni i ‘superligës së hajnave’ është i Hashim Thaçit. Ai e ka pru vendin në këtë gjendje. Duhet me iu ardhë keq edhe qytetarëve dhe atyre që e përkrahin këtë njeri”, ka thënë Haradinaj.
