Haxhinasto-kompanive: Asnjë rrugë pa standarde nuk do merret në dorëzim

Ministri i Transportit dhe Infrastrukturës, Edmond Haxhinasto, deklaroi sot se asnjë rrugë nuk do të merret në dorëzim si e përfunduar nëse nuk do jetë e pajisur me sinjalistikë të rregullt ndriçimi dhe sigurie. “Është momenti për të bërë gjithashtu një tërheqje vëmendje për kompanitë e tjera që janë në proçesin e realizimit të projekteve rrugore, theksoi ai.

Duhet t’i përfundojnë ato me cilësi dhe standardet e duhura, duke përfshirë të gjithë elementët”, tha ministri.
Ai vuri në dukje se Autoriteti Rrugor Shqiptar nuk do ta quajë të përfunduar veprën nëse nuk është e pajisur me të gjithë këto elementë me standardin e duhur.

Po ashtu, kreu i MTI-së apeloi edhe qytetarët për ndërhyrjet në sistemin rrugor duke përvetësuar pronën publike, apo elementë të tjerë të ndriçimit e sinjalistikës. “Është koha që Shqipëria të ketë nivelin më të lartë të standardeve për rrugët, sinjalistikën, për ndriçimin e tyre”, tha ai.

Haxhinasto i bëri deklaratat gjatë inaugurimit të sistemit të ndriçimit në segmentin rrugor Sauk-rrethrrotullimi i Tegut, pjesë e Unazës së Madhe të Tiranës.