Helikopteri i FA-së evakuon 2 persona në Selenicë

Një helikopter i Forcave të Armatosura  evakuoi dje dy qytetarë të bllokuar në një furgon në Bishtin e Malit, në Selenicë.

Për këtë aksion të përbashkët mes FA-së dhe Policisë së Shtetit, u nevojit ndërhyrja nga ajri pas kërkesës për helikopter të bërë rreth orës 14.00. Dy bashkëshortët, Liljana dhe Bashkim Muhaj nga Selenica u arrit të shpëtohen falë ndërhyrjes me helikopter.

“Dy persona të bllokuar në mes të ujit në Bishtin e Malit evakuohen përmes aksionit të përbashkët të Forcave të Armatosura dhe Policisë së Shtetit. Faleminderit efektivëve për profesionalizmin dhe punën e palodhur”, shkruan ministrja e Mbrojtjes Olta Xhaçka, në rrjetin social “Facebook”.

Po ashtu në Levan Forcat e Armatosura evakuan dy persona të bllokuar mes ujit në mjetin e tyre.

Ndërkohë Ministrja e Mbrojtjes, Olta Xhaçka ishte ne Novoselë për të inspektuar situatën në terren.