Hollande vizitë historike në Kubë

Presidenti francez, François Hollande filloi sot vizitën historike në Kubë, i pari lider perëndimor që viziton ishullin komunist, që pas shkrirjes së akujve mes Uashingtonit dhe Havanës.

Qëllimi i kësaj vizite është edhe përfaqësimi i interesave ekonomike franceze dhe evropiane në vend.

“Vij me shumë emocione sepse kjo është hera e parë që një president francez vjen në Kubë”, tha Hollande pas mbërritjes në aeroportin e Havanës.

Pritet që Hollande të takohet pasdite me homologun e tij kubanez, Raul Castro.

Si partneri i dhjetë ekonomik i Kubës, Franca dëshiron të forcojë praninë e saj në tregun kubanez dhe të mundësojë hapjen e ekonomisë së ishullit.

Hollande shoqërohet nga një numër i madh drejtuesish kompanish franceze.