Hyn në fuqi ligji i ri antiduhan

 Sot hyn në fuqi ligji i ri antiduhan, i cili me ndryshimet e bëra parashikon për herë të parë ndëshkimin me gjobë edhe për duhanpirësin.
Prej ditësh Inspektoriatit Shëndetësor Shtetëror është angazhuar për zbatimin me rreptësi të këtij ligji, duke përgatitur si subjektet private, por dhe institucionet publike që të mos lejojnë askënd të konsumojë duhan në ambientet e tyre të mbyllura.
Zyrtarë të Inspektoriatit Shëndetësor janë shprehur të vendosur për zbatimin me rigorozitet të ligjit te ri, nga i cili nuk do të ketë tërheqje. Sipas tyre zbatimi i tij do të shoqërohet dhe me një fushatë promocionale dhe subjektet do të informohen në mënyrë të detajuar lidhur me ndryshimet e bëra.
Ligji i ri antiduhan, i miratuar pak muaj më parë në parlament, parashikon ndëshkimin me gjobë për personin që shkel ligjin, duke konsumuar duhan në ambiente të mbyllura në masën 5 mijë lekë, për administratorin e ambientit në masën 50 mijë lekë dhe për pronarin e subjektit në masën 300 mijë lekë