Ivanov: Sulmi ndaj “Charlie Hebdo”, sulm ndaj demokracisë

Presidenti Gjorge Ivanov ngushëlloi me anë të një telegrami homologun francez Francois Hollande, në lidhje me sulmin e armatosur dje në Paris, ku mbeten të vrarë gjithsej 12 persona.

Në telegram, Ivanov thotë se ka marrë me hidhërim lajmin për masakrën në Paris dhe se është i keqardhur për jetët e humbura.

Ivanov thotë se sulmin ndaj revistës “Charlie Hebdo” e përjeton si sulm ndaj demokracisë dhe kundër parimeve dhe lirisë së të menduarit dhe të folurit.

“Ky akt i tmerrshëm kryer nga individë mendje mbyllur, qëllimi i të cilëve është përhapja e frikës dhe pasigurisë dhe viktimat e të cilëve janë njerëz të pafajshëm, nuk do të na lëkundë në luftën tonë për mbrojtjen e vlerave njerëzore dhe civilizuese të mbarë botës demokratike”, thuhet në telegramin e presidentit Ivanov.

Ai afirmoi se Maqedonia mbështet fuqimisht përpjekjet globale për të luftuar terrorizmin.