Jahjaga, apel palëve të kthehen në Kuvend për debat
Presidentja e Kosovës, Atifete Jahjaga, edhe një herë u bëri thirrje partive politike në vend që të kthehen në Kuvend për të debatuar.
Ajo dënoi veprimet e opozitës që u zhvilluan dy netë përpara, pranë stacionit policor në Prishtinë. E para e vendit thotë se mosmarrëveshjet duhet të zgjidhen brenda Kuvendit të Kosovës, me debat.
“Dhuna dhe ajo çfarë pamë dy netët më parë në kryeqytetin e Kosovës është e papranueshme dhe duhet të dënohet nga të gjithë ne. Të gjitha mosmarrëveshjet politike duhet të adresohen dhe të zgjidhen brenda institucioneve të Republikës së Kosovës dhe normalisht duhet të zgjidhen përmes mekanizmave dhe përmes normave demokratike”, tha ajo.
Presidentja kujtoi se Kuvendi është institucioni ku deputetët janë që të veprojnë në interes të qytetarëve të Kosovës, zgjidhjes së problemeve të tyre, e jo t’i thellojnë edhe më shumë ato.
“Ju bëjë thirrje që ky debat të kthehet në Kuvendin e Kosovës dhe t’i hapin rrugë dialogut dhe bashkëbisedimit në mënyrë që të gjejmë një mirëkuptim për interes të shtetit tonë, për interes të qytetarëve tanë”, tha ajo.
Këto komente shefja e vendit i bëri pas vizitës që zhvilloi në Institutin e Onkologjisë, në Shërbimin Spitalor, Klinik e Universitar të Kosovës.
