Jahjaga, takim me udhëheqësit politikë për krizën në Kuvend

Presidentja e Kosovës, Atifete Jahjaga, tha në një konferencë për media se ka marrë iniciativë që të presë në takim krerët e Kuvendit dhe të qeverisë dhe pas tyre edhe liderët e partive politike për të diskutuar për daljen nga kriza aktuale politike në Kosovë.

Jahjaga tha se tashmë ua ka dërguar ftesat të gjitha partive për t’i takuar veç e veç dhe pastaj në një tryezë të përbashkët, për të diskutuar për të gjetur zgjidhje për gjendjen aktuale.

Ajo i ftoi liderët për mirëkuptim dhe për vullnet për të diskutuar për gjendjen aktuale politike dhe për të gjetur zgjidhje, pasi sipas saj, vendit si asnjëherë më parë i duhet stabilitet.

Jahjaga i bëri këto komente pas takimit me kryeparlamentarin Kadri Veseli, ndërsa gjatë ditës ajo do të takojë edhe kryeministrin Isa Mustafa dhe gjithë liderët e partive politike parlamentare, bashkë me shefat e Grupeve Parlamentare.