Jetojnë pranë kanalizimeve të hapura, rrezikohen nga Tularemia

Kanalizimet e hapura në Prishtinë paraqesin rrezik për epideminë Tularemi, raporton emisioni ‘038’ i KTV-së.

Kjo sëmundje që bartet kryesisht nga brejtësit, paraqet rrezik për ata banorë të kryeqytetit që jetojnë pranë kanalizimeve të hapura, aty ku ushqehen minjtë.

Burbuqe Nushi nga Instituti Kombëtar i Shëndetit Publik, ka kërkuar nga këta banorë të kenë kujdes me ushqime duke i larë ato mirë, pasi që, sipas saj, brejtësit janë njëri ndër shkaktarët për këtë sëmundje.

Në Komunën e Prishtinës thonë se e dinë që gjendja me kanalizime është shumë e keqe, por që po punojnë në rregullim të rrjetit jo vetëm aty ku nuk ka, po edhe në lagjet ku është i ndërtuar keq.

Sipas drejtorit Hysen Durmishi, Komuna për këtë ka kërkuar ndihmë nga niveli qendror dhe nga donatorët.

Nga kanalizimet e hapura më së shumti probleme kanë Kalabria, lagjja e Spitalit e Hajvalia.