Kërkimi shkencor, reformë institucioneve dhe ligj të ri

Reforma në kërkimin shkencor kërkon domosdoshmërisht edhe procesin e konsultimit, si projektues i hapave të mëtejshëm në të. Këtë u tha kryeministri Rama drejtuesve të universiteteve, të akademise së shkencave, akademikëve e pedagogëve gjatë një takimi zhvilluar në Sallën e hartave në Kryeministri. Rama parashtroi hapat e mëtejshëm që pritet të plotësohen brenda datës 10 qershor.

“Ftesa ime është ajo e herës së parë; Të çojmë përpara këtë proces, pa humbur kohë. Së bashku, pranë MAS të ngremë një grup pune për miratimin e strategjisë së kërkimit shkencor. E dyta, të ngremë një grup pune për ligjin e ri për shkencën. E një grup të tretë, për të pasur një qasje të përbashkët për reformën në sistemin e institucionit të shkencës, pra, akademia, institutet, qendra dhe agjencitë e kërkimit shkencor. Të gjithë raportin ku do përfshihen të gjithë opinionet, ne do t’ia dërgojmë secilit prej jush”, tha kryeministri Rama.

Kryeministri i njohu akademikët me një klasifikim të përgjithshëm të opinioneve dhe propozimeve të marra si mungesa e një analize shteruese të shkaqeve të performancës së pamjaftueshme dhe çështjen e financimit. Takimi zhvillohet pas procesit të auditimit dhe vjeljes së opinioneve që secili prej këtyre institucioneve ka kryer për të identifikuar problematikat dhe propozuar zgjidhje, me qëllim përmirësimin e funksionimit sa më efikas të tyre.