Këshilli Bashkiak i Tiranës krijon bordin rinor këshillimor

Këshilli Bashkiak i Tiranës dhe Shtëpia e të Drejtave të Njeriut / CRCA Shqipëri, në bashkëpunim me Lidershipin e të Rinjve të Tiranës, organizuan sot ceremoninë e nënshkrimit të aktit të themelimit të Bordit Rinor Këshillimor pranë Këshillit Bashkiak Tiranë.

Ky akt u nënshkrua nga 33 organizata rinore, anëtare të rrjetit rinor ‘Lidershipi i të Rinjve të Tiranës’, të cilat do të jenë gjithashtu pjesë e këtij bordi.

Bordi Rinor Këshillimor do të funksionojë si një strukturë këshilluese nga të rinjtë për të rinjtë pranë Këshillit Bashkiak Tiranë dhe do të ketë për qëllim rritjen e përfaqësimit të të rinjve të Tiranës në nivel lokal në të gjitha fazat e vendimmarrjes e hartimit të politikave për të rinjtë.

Kryetari i Këshillit Bashkiak Tiranë, Aldrin Dalipi, në fjalën e tij e vuri theksin tek rëndësia e pjesmarrjes së të rinjve në hartimin e politikave për të rinjtë në nivel lokal, pasi vetëm kështu zëri i komunitetit mund të dëgjohet. Ai propozoi që Borde të tilla rinore të shtrihen në të gjithë vendin.

Ndërsa, Altin Hazizaj, drejtor i HRH/CRCA Shqipëri, u përqëndrua në rëndësinë e ngritjes së Bordit Rinor Këshillimor si një mekanizëm e model pozitiv, i cili i jep shtysë pjesmarrjes së qytetarëve në vendimmarrje.

Përfaqësuesja e Rrjetit Rinor “Lidershipi i të Rinjve të Tiranës”, Aspasjana Kërxhalli, në fjalën e saj theksoi mënyrat sesi interesat e të rinjve mund të adresohen në qeverisjen lokale dhe u shpreh se Bordi Rinor Këshillimor duhet të jetë pjesë e këshillimit të vazhdueshëm për çështje të ndryshme që prekin të rinjtë.