Këshilli Ekonomik, Rama: Reforma në drejtësi ndihmon në klimën e biznesit
Mbledhjen e kësaj të mërkure të Këshillit Ekonomik Kombëtar, kryeministri Edi Rama e ka shfrytëzuar për të promovuar gjithçka të mirë të bërë nga bota e sipërmarrjes deri më tani në këto 32 muaj qeverisjeje të së majtës, për të analizuar kërkesat e tyre mbi paketën fiskale apo edhe reduktimin e burokracive, por edhe për të shprehur faktin që klima e biznesit në drejtësi do të përmirësohet edhe më shumë pasi të miratohet reforma në drejtësi.
Rama ka lavdëruar punën e kryer nga investitorë të shumtë, vepra e të cilëve do të mbetet në të gjitha qytetet ku ata kanë vendosur të investojnë, sikurse ka lavdëruar edhe punën e Bankës së Shqipërisë për ndryshimin e strukturës ekonomike të vendit, që ka qenë edhe një prej qëllimeve të qeverisë. Modeli i ri ekonomik, siç ka theksuar Rama kërkon zbatimin e disa reformave themelore si ato të energjisë, administrativo-territorialja, e pensioneve, por mbi të gjitha ka nevojë për miratimin e reformës në drejtësi, siç e ka përcaktuar edhe Fondi Monetar Ndërkombëtar.
Rama ka pranuar se klima e biznesit në Shqipëri ka vend për përmirësime të mëtejshme, ndaj dhe për këtë arsye ka theksuar edhe disa prej synimeve, si reduktimi në maksimum i burokracive për të thjeshtuar rrugën e investitorëve, sikurse edhe reduktimin e barrierave jotarifore për biznesin. Kryeministri i vendit njoftoi gjithashtu se qeveria po punon edhe për ngritjen e një institucioni, që do të funksionojë si avokat i biznesit. Por, Rama nuk ka harruar të thotë se, është e lehtë të kritikohet qeveria si penguese e biznesit, sepse kjo është qeveria më probiznes, siç theksoi ai, teksa ka kujtuar se kur erdhi në pushtet, shumë prej të pranishmëve i gjeti “në gropë, ose të lidhur pas pemës”.
