Këshilli i BE miraton MSA me Kosovën, nënshkrimi në 27 tetor

Këshilli i Bashkimit Evropian miratoi sot Marrëveshjen për Stabilizim Asocim me Kosovën dhe konfirmoi nënshkrimin e saj më 27 tetor, bën të ditur ministri i Integrimeve Evropiane i Kosovës, Bekim Çollaku.

Në një postim në rrjetin social Facebook, ministri Çollaku thekson se ” miratimi i sotëm i MSA-së nga shtetet anëtare të BE-së është moment historik për Kosovën, dhe hap faqen e re drejt qëllimit përfundimtar të anëtarësimit të Kosovës në BE. Të gjitha institucionet kanë punuar jashtëzakonisht shumë për të ardhur në ditën e sotme. Procesi negociator për MSA ka filluar në vitin 2013 dhe dëshiroj të falënderoj të gjitha institucionet shtetërore për punën e tyre gjatë negociimit të MSA-së, si dhe partnerë tone ndërkombëtare për përkrahjen e tyre”.

MSA parashikon themelimin e marrëdhënieve kontraktuale ndërmjet Kosovës dhe Bashkimit Evropian dhe paraqet hapin e parë formal drejt anëtarësimit të plotë në BE. MSA përmban 597 faqe, në X tituj, VII anekse dhe 5 protokolle. Ministria për Integrim Evropian ka bërë të gjitha përgatitjet ligjore për nënshkrimin e MSA-së dhe procedimin e mëtejshëm për ratifikim në Kuvendin e Republikës së Kosovës, bën të ditur Ministria e Integrimit.