Kirby: Serbia ka respekt të lartë për KFOR-in
Komandanti i KFOR-it, gjeneral-major Francesco Paolo Figliuolo, sot prit në një takim në Prishtinë, ambasadorin amerikan në Serbi, Michael D. Kirby.
Gjatë vizitës së tij në Shtabin e KFOR-it, ambasadori Kirby diskutoi me Gjeneralin Figliuolo rreth zhvillimeve më të fundit të sigurisë dhe gjendjen socio-ekonomike në Kosovë. Ambasadori amerikan theksoi rolin vendimtar të KFOR-it për një mjedis të sigurt në Kosovë, në të mirën e të gjithë qytetarëve të Kosovës.
Ai gjithashtu përmendi respektin e lartë që autoritetet serbe kanë për KFOR-in, duke e konsideruar atë të jetë element kryesor stabiliteti në Kosovë dhe në Ballkan. Në takimin i cili u mbajt në Shtabin qendror të KFOR-it në Prishtinë, mori pjesë edhe ambasadorja e SHBA-ve në Kosovë, Tracey Ann Jacobson.
Ata gjithashtu biseduan për progresin pozitiv të arritur gjatë bashkëpunimit ndërmjet KFOR-it dhe akterëve të tjerë rajonal të sigurisë.
Komandanti i KFOR-it e shfrytëzoi rastin për të shprehur mirënjohjen e tij për kontributin dhe mbështetjen e SHBA-ve, duke theksuar profesionalizmin dhe angazhimin e anëtarëve të shërbimit të SHBA-së që nga viti 1999 si pjesë e misionit të KFOR-it.
Përndryshe, aktualisht kontingjenti amerikan në Kosovë përbëhet nga rreth 700 ushtarë, duke pasur epërsinë e Grupit shumëkombësh të luftarak-Lindje, me bazë në Kampin “Bondsteel”, dhe trupa të tjera amerikane që janë pjesë e Stafit të Shtabit qendror të KFOR-it në kampin “Film City”.
