Kodheli inspekton Policinë Ushtarake: Profesionalizëm në luftë ndaj krimit
Ministrja e Mbrojtjes, Mimi Kodheli, e shoqëruar nga shefi i Shtabit të Përgjithshëm i FA-së, ka zhvilluar të enjten një inspektim në repartin e Policisë Ushtarake.
Ministrja Kodheli, u prit nga komandanti i Policisë Ushtarake, kolonel Xhedvdet Zeneli dhe më pas ka ndjekur një varg demonstrimesh ushtarake që lidhen me detyrat që kryejnë efektivat e kësaj policie në veprimtarinë e tyre të përditëshme ku u demonstruan veprime për hetimin dhe zbulimin e veprimtarisë kriminale në FA, për lirimin e objekteve të zëna por që janë në përdorim të FA, shoqërim të personliteteve të larta ushtarake dhe personave VIP.
Kodheli, pasi përgëzoj efektivat për demonstrimin stërvitorë, i vlerësoi për punën e bërë deri tani nga të gjithë sektorët e Policisë Ushtarake, ndërsa falenderoi në mënyrë të veçantë “Sektorin e Policisë Kriminale dhe të gjithë ata djem e vajza të policisë që janë angazhuar dhe kanë kontribuar në zbulimin dhe parandalimin e veprimtarisë kriminale dhe në mënyrë të veçantë në luftën kundër korrupsionit në FA”.
Po ashtu, ministrja Kodheli theksoi se, “sapo kemi miratuar në Parlament disa prej ligjeve me kryesore siç janë: Ligji për Autoritetet e Drejtimit dhe Komandimit Strategjik, Ligji për Karrierën Ushtarake, Ligji për Agjencinë e Inteligjencës dhe Sigurisë së Mbrojtjes dhe po punohet nga grupet e punës edhe për një sërë ligjesh të tjera që do t’i japin FA bazën ligjore me të cilën ndërtojnë punën dhe aktivitetin e tyre të përditshëm bazuar në realitetet e reja që po jetojmë. Në këtë kontekst, ka nënvizuar ajo, ligji i ri që po përgatitet “Për Policinë Ushtarake në FA” do të bëjë të mundur një mbështetje më të mirë ligjore për realizimin e misionit tuaj, në mënyrë të veçantë, në luftën ndaj krimit në përgjithësi dhe korrupsionit në FA në veçanti”.
Në fund të fjalës së saj, ministrja e Mbrojtjes Kodheli ka shprehur besimin e palëkundur se, efektivat e Policisë Ushtarake edhe në të ardhmen do të punojnë pa u lodhur për krijimin e një policie sa më profesionale dhe të aftë për të kryer çdo detyrë që do iu ngarkohet, në mbështetje të misionit të tyre fisnik.
