Komisionet e Vettingut, Meta mbledh Kuvendin të martën

Kreu i Kuvendit Ilir Meta njofton thirrjen e seancës plenare për ngritjen e komisioneve të vettingut. Kjo mbledhje vjen pas ridërgimit të listës së kandidatëve nga Avokati i Popullit.

Kreu i Kuvendit në njoftimin dërguar krerëve të grupeve parlamentare njofton mbledhjen ditën e martë, më 11 prill, në orën 18.00.

Në seancë është parashikuar miratimi i projektvendimit për procedurat parlamentare për funksionimin e komisioneve ad hoc dhe realizimin e procesit të votimit. Gjithashtu parashikohet dhe miratimi i projektvendimit për krijimin dhe përbërjen e komisionit ad hoc për verifikimin e kandidatëve për institucionet e rivlerësimit.

Ndërkaq, krerëve të grupeve parlamentare u kërkohet që brenda datës 11 prill, ora 16.00 të dërgojnë propozimet për përbërjen e komisionit parlamentar ad hoc për verifikimin e kandidatëve.

Ky komision përbëhet nga 6 anëtarë, të ndarë në mënyrë të barabartë midis shumicës dhe pakicës parlamentare.