Komiteti i jashtëm i PE rekomandon heqjen e vizave për Kosovën

Komisioni për punët e jashtme të Parlamentit Europian ka deklaruar se, Bashkimi Europian duhet të liberalizojë vizat për qytetarët e Kosovës.

Anëtarët e komitetit kanë miratuar këtë rekomandim me vlerësimin se vendi ka regjistruar progres të dukshëm në implementimin e kritereve të vendosura për heqjen e vizave.

Në rekomandim vlerësohet se liberalizimi i vizave do të jetë një instrument i rëndësishëm në politikën e jashtme dhe atë të sigurisë të BE-së, si dhe do të shërbejë për kontaktet mes popujve. Votimi për heqjen e vizave kaloi me 38 vota pro, 7 kundër dhe 6 abstenim.

“Jam e bindur se qytetarët e Kosovës meritojnë heqjen e vizave sa më shpejt të jetë e mundur. Mungesa e perspektivës për të udhëtuar lirshëm vetëm për këtë pjesë të rajonit është e papranueshme dhe duhet të marrë fund. Tani gjithçka është në duart e politikanëve të Kosovës, ata duhet të ratifikojnë marrëveshjen e demarkacionit me Malin e Zi dhe shënojnë progres në ndëshkimin e rasteve të korrupsionit dhe krimit të organizuar”, deklaroi raportuesja për Kosovën në PE, Ulrike Lunaçek.

Me të njëjtat argumente komisioni i rekomandoi BE-së liberalizimin e vizave edhe për Ukrainën dhe Gjeorgjinë, përkatësisht me 42 vota pro, 3 kundër dhe 6 abstenim; dhe 43 vota pro, 5 kundër dhe 3 abstenim.