Korrupsioni, çohen për gjykim 4 zyrtarë të Drejtorisë Arsimore në Fier

Prokuroria e Fierit ka dërguar për gjykim kërkesën ndaj 4 zyrtarëve të sistemit arsimor të cilët akuzohen për korrupsion e shpërdorim detyre.

Bëhet fjalë për ish-drejtorin e shkollës “Adem Vrapi”, i akuzuar për veprën penale të “Korrupsionit pasiv” dhe “Falsifikimi i dokumenteve”, si edhe për 3 punonjëse të Drejtorisë Arsimore Fier, të akuzuara për veprën penale të “shpërdorimit të detyrës.

Nga hetimi i prokurorisë së Fierit, bazuar në informacionin e referuar nga Policia e Shtetit, rezulton se shtetasi Faik Beqaj, në pozicionin e drejtorit të shkollës së mesme, plotësonte vërtetime fiktive për shtetas të ndryshëm për përfundimin e studimeve të gjimnazit, në këmbim të shumave të ndryshme të parave.

Ndërsa shtetaset Valbona Mitro, Mirela Emiri dhe Manushaqe Durmishaj, specialiste në Drejtorinë Arsimore Fier, akuzohen për “shpërdorim detyre”, pasi, pavarësisht se e kanë pasur detyrë funksionale, nuk kanë kryer asnjë verifikim lidhur me vërtetimet që ka dërguar pranë kësaj drejtorie shtetasi Faik Beqaj, në cilësinë e drejtorit të gjimnazit “Adem Vrapi”.