Kosova nis përgatitjet për Konferencën e Parisit

Ministri i Integrimit Evropian, Bekim Çollaku, priti sot në takim ambasadoren e Francës në Kosovë, Maryse Daviet, ku temë kryesore ishte përgatitja e Kosovës për pjesëmarrjen në Konferencën e Parisit këtë vit, si vazhdimësi e Procesit të Berlinit

“Konferenca e Parisit, do të jetë një mundësi e jashtëzakonshme për forcimin e bashkëpunimit rajonal përmes realizimit të projekteve të ndryshme përmes së cilave do të përfitojnë qytetarët e Kosovës dhe vendeve tjera të Ballkanit Perëndimor në kuadër të procesit të integrimit evropian. Fokusi i konferencës së Parisit përveç projekteve infrastrukturore që tashmë janë dakorduar, do të jetë tek fuqizimi i rolit të rinisë në vendet e Ballkanit Perëndimor nëpërmj et programeve të ndryshme që do të financohen nga BE”, nënvizoi Çollaku.

Procesi i Berlinit është nismë e kancelares së Gjermanisë, Angela Merkel, me qëllim të ofrimit të mbështetjes politike dhe financiare për shtetet e Ballkanit Perëndimor në procesin e integrimit evropian.
Procesi, filloi me Konferencën e Berlinit në vitin 2014, për të vazhduar me Samitin e Vjenës që u mbajt në gusht të 2015 dhe këtë vit vijon me Konferencën e Parisit.

Gjatë takimit Çollaku dhe Daviet diksutuan edhe për axhendën evropiane të Kosovës duke u fokusuar në procesin e liberalizimit të vizave, si dhe përgatitjet për fillimin e zbatimit të Marrëveshjes së Stabilizim Asociimit.