Kreditimi për ekonominë shënoi vlerën 557 miliardë lekë, në gusht

Gjallërimi i aktivitetit privat në vend tani po gjen reflektim edhe në ecurinë e kreditimit.

Kredia për ekonominë mori një tjetër hov në rritje gjatë muajit gusht, duke arritur vlerën e afro 557 miliardë lekëve, në rritje me mbi 6 miliardë lekë krahasuar me korrikun.

Sipas raportit të publikuar së fundi nga Banka e Shqipërisë, rritja vjetore e kredisë u katërfishua në 2.1%, nga rreth 0.5% që kishte muajin paraardhës, duke konfirmuar kështu se kreditimi është në rrugën e rimëkëmbjes. Kthimi i rritjes së kredisë i detyrohet kryesisht huadhënies së biznesit, që gjatë gushtit u rrit me më shumë se 6 miliardë lekë.

Përmirësimi i gjendjes së likuditetit në treg dhe rritja më e mirë ekonomike ka bërë që gjatë këtij viti biznesi të rrisë kërkesën për kredi bankare. Ndërkohë, edhe oferta e bankave për të dhënë kredi vlerësohet e përmirësuar, falë rritjes së fitimeve, por edhe stabilizimit të kredive me probleme, si rezultat i disa viteve punë intensive për menaxhimin e portofolit problematik, por edhe politikave më të kujdesshme në dhënien e kredive të reja.
Edhe për gushtin, rritja e kredive ka ecur paralelisht me rritjen e depozitave, që për gushtin u rritën me 4.5 miliardë lekë. Ndonëse këtë vit bankat nuk aplikuan oferta agresive, krahasuar me të njëjtën periudhë të një viti më parë, vlera e depozitave bankare rezulton në rritje me 1.5%. Raporti mes huave dhe depozitave ngelet në nivele të ulëta, rreth 57.8%, çka tregon se sistemi bankar ngelet mjaft likuid dhe me rezerva të lira për të rritur kreditimin e ekonomisë.