Kush e kërkon Balilin? Manjani: Nuk di të ketë urdhër arresti

Klemend Balili, i konsideruar nga autoritetet policore greke si “baroni i drogës” në Ballkan, duket se është zhdukur dhe po vijon i qetë arratinë e tij.

Autoritetet shqiptare, përfshirë këtu ministrin e Drejtësisë Ylli Manjani, nuk janë në gjendje të japin një informacion të saktë për të.

“Nuk di të ketë urdhër arresti”, i është përgjigjur shkurt Manjani interesit të mediave, pas një takimi me kryeprokurorin Llalla.

Në lidhje me të përfolurën pajisje përgjimi, ministri i Drejtësisë kërkoi që të kihet durim dhe të pritet rezultati i hetimit të prokurorisë.

“Ka një hetim për këtë çështje. Të kemi durim dhe të dalin përfundimet e të dali e vërteta nëse ka një pajisje të tillë. Besoj tek rezultatet e hetimit nga prokuroria, ka një hetim për këtë dhe duhet të kemi durim. Të gjitha të tjerat janë spekulim që nuk e ndihmojnë këtë çështje”, deklaroi Manjani.

Ministri tha se askush nuk duhet t’i trembet hetimit për këtë çështje dhe u bëri thirrje prokurorëve që të hetojnë deri në fund.

“Nga hetimi nuk duhet të ketë frikë askush. Ka përfunduar koha kur qeveria nuk respekton vendimet e prokurorëve. Prokuroria të kryejë verifikimet dhe të marrë në dorëzim dokumentacionin për pajisjen dhe jo të presë letër-përgjigjie sepse në të tilla raste…”, u shpreh ai.