Kuvendi mblidhet të hënën më 2 nëntor

Kryesia e Kuvendit të Kosovës vendosi që seanca e radhës të mbahet ditën e hënë, më datë 2 nëntor.

Në përfundim të mbledhjes së Kryesisë, kreu i Kuvendit, Kadri Veseli kërkoi nga policia garantimin e kushteve të sigurisë për mbajtjen e seancës. A

“Ekziston nje vendosmeri e punës së grupeve parlamentare, por edhe një shqetësim politik për mungesën e kushteve për punë brenda seancës, pasi po ballafaqohen me gjëra të pahijshme dhe të rrezikshme për jetën. Deri më tani, në Kuvend janë përdorur vezë e gjëra të tjera. Kryesia e Kuvendit do të respektojë rregulloren, ama në anën tjetër ne duhet të sillemi me atë rregullore. Ne nuk jemi boksierë. Kërkojmë nga institucionet përgjegjëse të na krijojnë kushte, pasi përgjegjësinë për çdo gjë deri më tani e ka pasur Kuvendi dhe deputetët”, tha Veseli.

Normalizimin e punës në Kuvend ka kërkuar edhe kreu i grupit parlamentar të PDK-së, Adem Grabovci.

“Këmbëngulim që Kuvendi duhet të vazhdojë me punën. S’ka asnjë forcë që do ta pengojë”, tha ai.