Kuvendi seancë plenare, demarkacioni nuk është në rend dite
Kuvendi i Kosovës nisi seancën plenare të enjten ku në rend dite janë tre pika, por nuk është Demarkacioni me Malin e Zi.
Në seancën që nisi me 2 orë vonesë janë të pranishëm 77 deputetë.
Me propozim të kryetarit të Grupit Parlamentar të LDK, Ismet Beqiri, Kuvendi me shumicë votash, 80 pro e 2 abstenime, futi në rend dite me procedurë të përshpejtuar Projektligjin për ratifikimin e marrëveshjes për hua ndërmjet Republikës së Kosovës dhe Bankës Gjermane KfW Frankfurt Am Main për programin “Masat e Efiçencës së Energjisë në Ndërtesat Publike në Nivel Komunal në Kosovë”. Ky projektligj u rendit si pikë e parë e axhendës së seancës plenare dhe u miratua me 87 vota pro, 1 abstenim e 1 kundër.
Drafti i buxhetit është diskutuar dhe është i dakorduar plotësisht me Fondin Monetar Ndërkombëtar e më pas u miratua në fillim të këtij muaji, në 1 korrik, nga qeveria e Kosovës në mbledhjen e 99-të, të 31-tën në vitin 2016.
Buxheti i Shtetit për vitin 2016, i miratuar në Kuvendin e Kosovës brenda afatit ligjor, si u theksua me atë rast, është në linjë të plotë me objektivat e qeverisë për rritje të qëndrueshme ekonomike e stabilitet buxhetor.
Të hyrat e rregullta buxhetore për vitin 2016 ishin planifikuar të jenë 1 miliard e 598 milionë euro, që është një rritje prej 4.1% krahasuar me vitin 2015 dhe 19% më shumë se në vitin 2014. Për vitin 2016, shpenzimet bazë parashihej të jenë 1 miliard e 678 milionë euro.
Në axhendën e seancës plenare të Kuvendit të Kosovës sot janë edhe shqyrtimi i dytë i Projektligjit për ndryshimin dhe plotësimin e Ligjit për financat e pushtetit lokal dhe shqyrtimi i Raportit vjetor të Bankës Qendrore të Republikës së Kosovës për vitin 2015.
Në Kuvendin e Kosovës ende nuk është në axehendë demarkacioni i kufirit me Malin e Zi, për ratifikimin e të cilit duhen së paku 80 vota nga 120 deputetët sa janë gjithësej. Qeveria e Kosovës e ka shtyrë mbledhjen që pritej të mbahej dje, ku do të vendosej për ta proceduar për ratifikim në Kuvend Marrëveshjen për demarkacionin e kufirit me Malin e Zi. Vendimi për shtyrjen e mbledhjes u mor pasi partia më e madhe kosovare, e koalicionit qeverisës, PDK, ka kërkuar që qeveria të mos ngutet.
Sipas shtypit të sotëm në Prishtinë, PDK e sheh të nevojshme arritjen e një konsensusi nacional për çështjen e demarkacionit me Malin e Zi, derisa partia e dytë kosovare dhe e koalicionit qeverisës, LDK, insiston se demarkacioni shumë shpejt do të shkojë në Kuvend. Opozita ka një alternativë që kjo çështje të zgjidhet deri në shtator.
