Lajcak e quan te dobishem takimin me Vuciq
Emisari i Bashkimit Evropian për dialogun Kosovë-Serbi, Miroslav Lajçak, ka reaguar pas takimit me presidentin e Serbisë, Aleksandër Vuçiç duke theksuar se ka rënë dakord për rëndësinë e ndërmarrjes së hapave urgjentë për të de-përshkallëzuar tensionet në veri dhe për të përparuar në normalizimin e marrëdhënieve mes dy vendeve.
“Pata një takim të dobishëm me Aleksandër Vuçiç, pas takimit të sotëm të kryenegociatorëve. Ne ramë dakord për rëndësinë që urgjentisht të ndërmerren hapa për të de-përshkallëzuar situatën në veri të Kosovës dhe për të bërë përparim të shpejtë në normalizimin e marrëdhënieve”, ka shkruar Emisari i Bashkimit Evropian për dialogun Kosovë-Serbi, Miroslav Lajçak, në Tëitter.
Më herët Lajçak ka reaguar për takimin me kryenegociatorin e Kosovës, Besnik Bislimin dhe të Serbisë, Petar Petkoviç.
Përmes një postimi në rrjetin social Twitter, ka theksuar se diskutimet gjatë takimeve dypalëshe kanë përfshirë një sërë çështjesh, duke filluar nga zbatimi i Marrëveshjes së 27 shkurtit e deri te depërshkallëzimi i situatës në veri të Kosovës.
Ai ka shtuar se diskutimet do të vazhdojnë edhe në periudhën e ardhshme për të gjetur zgjidhje të qëndrueshme për tensionet aktuale mes Kosovës dhe Serbisë.
