Lanë mandatin, por ish-deputetët e PD-LSI do paguhen edhe për… 3 vjet
Asnjëri prej tyre nuk e ka menduar ende të bëjë një punë tjetër. Prej më se një muaji ish-ligjvënësit e opozitës i gjejmë në protesta ose pranë elektoratit në zonat ku u zgjodhën deputetë në vitin 2017, por ende jo në një zyrë punë.
Kjo e ka një arsye. Përtej nivelit të pasurisë së gjithsecilit, edhe pse lanë mandatet, trajtimi financiar për deputetët vazhdon të paktën 3 vite më pas.
Sekretari i përgjithshëm i Kuvendit i ka njohur zyrtarisht ish-ligjvënësit e Partisë Demokratike dhe Lëvizjes Socialiste për Integrim lidhur me përfitimet që u njeh ligji pas largimit nga funksioni.
Dy paga shpërblim dhe gjysmë page çdo muaj për aq kohë sa kanë ushtruar mandatin e deputetit.
Kjo përkthehet në 18 muaj për ata që mandatin e kishin për herë të parë dhe deri ne 3 vjet për ata që kanë më shumëse 1 mandat deputeti, raporton A2 CNN.
Muaji dhjetor ishte i fundit, i një bojkoti 6 mujor të opozitës.
Gjatë kësaj periudhe ata përfitonin mesatarisht gjysmë page çdo muaj.
Shifrës prej 20 300 000 lekëve, që i korrespondonin pagat e atij muaji, për të paktën 18 muajt e ardhshëm do t’i shtohen dhe pagat e deputetëve të rinj të opozitës, që zunë vendet e lëna bosh.
Deri më tani numri i tyre është 16.
