LDK ndryshon rregulloren e zgjedhjeve brendapartiake

Kryesia e Lidhjes Demokratike të Kosovës (LDK) ka shpërndarë sot edhe një komunikatë për mbledhjen e mbajtur dje, sipas të cilës në të diskutoi për procesin zgjedhor brendapartiak.

Kryesia konstatoi se, në përputhje me Statutin e ri të LDK-së, janë të nevojshme disa ndryshime në Rregulloret e zgjedhjeve te brendshme partiake.

Kryesia e LDK-së, po ashtu, diskutoi rreth prezantimeve që bënë Grupi punues për Platformë zgjedhore dhe Grupi punues për përgatitjet zgjedhore, të cilat u themeluan më 15 tetor 2014.

Grupi punues për përgatitjet zgjedhore prezantoi shkurtimisht draftin e parë të Rregullores së punës së Kuvendit të nëndegës/degës dhe procesin e regjistrimit të anëtarësisë së LDK-së.

Kryesia, sipas komunikatës, gjithashtu diskutoi edhe për procesin zgjedhor në Degën e Prizrenit, në të cilën kanë përfunduar zgjedhjet në shumicën e nëndegëve të LDK-së në Prizren. Kryesia e vlerëson si të suksesshëm procesin e deritanishëm zgjedhor në Degën e Prizrenit.

Përgatitjet teknike dhe njoftimet përkatëse për degët tashmë kanë filluar dhe në mbledhjet e ardhshme të Kryesisë dhe të Këshillit të Përgjithshëm do të caktohet data zyrtare e fillimit të zgjedhjeve brendapartiake.