Lëvizje në prokuroritë e rretheve, largohen të komanduarit në Elbasan, Fier dhe Kukës
Kryeprokurorja Arta Marku ka firmosur të tjera largime të drejtuesve të Prokurorisë, duke i kthyer ata në detyrat e mëparshme.
Në deklaratën zyrtare të prokurorisë së Përgjithshme bëhet e ditur se këto lëvizje bëhen në kuadër të riorganizimit, mirëfunksionimit të organit të akuzës, rritjes së performancës dhe besueshmërisë së publikut tek ky institucion.
Vetë Dritan Gina, që ka drejtuar Prokurorinë e Elbasanit për më shumë se një vit e gjysmë tha se shkarkimi është pa asnjë bazë ligjore.
Në vend të Ginës në Prokurorinë e Elbasanit është emëruar përkohësisht prokurori Ardjan Nezha. Gjithashtu i ndërpritet komandimi drejtuesit të Prokurorisë së Fierit Pali Decolli dhe emërohet në vend të tij po si drejtues i përkohshëm Fatmir Lushi.
Gjithashtu, kryeprokurorja Arta Marku ka firmosur ndërprerjen si drejtues i komanduar në Kukës të Artur Ismailukaj dhe zëvendësimin e tij me prokuroren Alketa Nushi, edhe kjo si e komanduar.
Të gjitha emërimet e kryeprokurores Arta Marku janë të përkohshme, pasi emërimet janë e drejtë vetëm e Këshillit të Lartë të Prokurorisë.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.