Liderët e Ballkanit Perëndimor firmosin tre marrëveshjet në Berlin
Liderët e 6 vendeve të Ballkanit Perëndimor kanë firmosur ditën e sotme në Berlin tre marrëveshjen për njohjen reciproke të letërnjoftimeve, të diplomave universitare dhe të kualifikimeve profesionale.
Në samit ndodhet kryeministri Edi Rama, i cili do të mbajë një fjalim së bashku me Von der Leyen.
Kosovën në këtë samit po e përfaqëson kryeministri Albin Kurti, ndërsa Serbinë kryeministrja Ana Bërnabiç.
Para fillimit të samitit, kryeministri i Kosovës, Albin Kurti u takua me përfaqësuesin e Lartë të BE-së për Punë të Jashtme dhe Politikë të Sigurisë, Josep Borrell, dhe përfaqësuesin e Posaçëm të Bashkimit Evropian për Dialogun Kosovë – Serbi, Miroslav Lajçak.
Kancelari gjerman, Olaf Scholz kërkoi përshpejtimin e procesit të normalizimit të marrëdhënieve mes Kosovës dhe Serbisë, gjatë fjalimit të tij hapës në samit.
“Është koha të tejkalohen konfliktet rajonale që kanë vazhduar shumë gjatë, konflikte që ju ndajnë juve dhe i mbajnë vendet tuaja prapa në rrugën evropiane. Procesi i normalizimit mes Kosovës dhe Serbisë në veçanti duhet të përshpejtohet, kështu që ejani ta bëjmë këtë”, tha Scholz.
Ai shtoi se Procesi i Berlinit synon edhe përshpejtimin e anëtarësimit të vendeve të Ballkanit Perëndimor në Bashkimin Evropian, duke thënë se realizimi i dëshirës së këtyre vendeve për të hyrë në BE “është në interesin tonë”.
“Sot jemi të bindur se procesi i Berlinit, jo vetëm që do të ndihmojë për shfrytëzimin e potencialit të plotë të bashkëpunimit rajonal, por do ta përshpejtojë anëtarësimin në BE të të gjitha vendeve të Ballkanit Perëndimor”, theksoi Scholz, duke shtuar se nënshkrimi i tri marrëveshjeve sot është një hap i rëndësishëm drejt këtij qëllimi.
