Lirohet minoreni i arrestuar për fyerje ndaj presidentit Erdogan
Një gjimnazist 16-vjeçar, i cili u arrestua dje në Konia (qendër të Turqisë), për fyerje të presidentit Recep Tayyip Erdogan, u lirua sot pas një padie të avokatëve të tij, raportoi media turke.
Arrestimi i tij, i pari i një minoreni për këtë arsye, ngriti kritika të forta të opozitës që i kritikoi këto veprime si “fashiste” nga ana e regjimit islamiko-konservator.
Një reagim të fortë pati edhe në rrjetet sociale.
“Minoreni, anëtar i një lëvizjeje të majtë akuzohet nga drejtësia se ofendoi të mërkurën presidentin e Turqisë gjatë një ceremonie për përkujtimin e një mësuesi të ri laik të vrarë nga islamikët në vitin 1930″, thekson kanali televiziv CNN Turk.
“Gjatë një fjalimi të mbajtur me këtë rast në sheshin e këtij qyteti, bastion islamik, djali i ri kritikoi Erdoganin dhe regjimin e tij duke e akuzuar kryesisht për korrupsion”, raporton gazeta “Hurriyet”.
I marë në pyetje nga policia në shkollën e tij dhe i nxjerrë në mbrëmje para një gjyqi, minoreni nuk i pranoi akuzat por megjithatë ai u akuzua dhe u burgos.
Ai rrezikonte deri në katër vite burg.
Kryeministri, Ahmet Davutoglu, i pyetur nga media për këtë çështje që ka shkaktuar shumë zemërim në rrjetet sociale, e mbrojti vendimin e drejtësisë duke u shprehur se “të gjithë duhet të respektojnë funksionin e presidentit”.
