Mamani: Sistemi bankar në Shqipëri është i qëndrueshëm

Sistemi bankar në Shqipëri është i qëndrueshëm, tha të mërkurën, Drejtori i Agjencisë së Sigurimit të Depozitave Genci Mamani, i pranishëm në komisionin e Ekonomisë.

Gjatë diskutimit të raportit vjetor të ASD-së, Mamani tha se për sa i përket strukturës, burimi kryesor i fondeve përbëhet nga depozitat e individëve dhe mbështetja e aktivitetit me kapital mbetet në nivele të larta, Në fund të 2015, sipas tij, përqindja e depozituesve që mbulohen plotësisht, arriti 96 % të totalit të depozituesve individë që përfitojnë nga skema e sigurimit të depozitave.

“Në vitin 2015 totali i depozitave në sistemin bankar u rrit me 2.2% krahasuar me vitin pararendës”, deklaroi Mamani, duke shtuar se treguesi i kredive me probleme ka rënë në fund të vitit 2015 duke arritur në 18.2%, kundrejt 22.8% të një viti më parë. Ndërsa fitimi neto i sistemit bankar në fund të vitit 2015, u shpreh ai, arrin në 15.7 miliardë lekë, kundrejt 11.2 miliardë lekë të një viti më parë.

Për periudhën 2009-2015, nënvizon Mamani, përqindja e numrit të depozituesve individëve me depozita deri në 2.5 milionë lekë, luhatet në kufijtë 95%-96% Depozitat e siguruara në sistem, tha ai, janë 591 miliard lekë dhe përbëjnë 66% të depozitave të individëve ose 56% të totalit të depozitave në sistem, krahasuar me 570.6 miliard lekë që ishin një vit më parë, duke shënuar një rritje me 20.5 miliard lekë në vlerë ose 3.6%. Në dhjetor 2015, peshën më të madhe të depozitave të siguruara e kanë depozitat në lek me 58%, ndjekur nga depozitat në euro me 37% dhe dollarë me 4%.

Sipas kreut të ASD-së, depozitat e siguruara që mbulohen plotësisht (depozitat që janë ≤ 2.5 milion lekë) përfaqësojnë 42% të depozitave të individëve dhe shuma e tyre në fund të 2015 është 368.17 miliard lekë. Këto
depozita u përkasin 2,028,208 depozituesve, të cilët përfaqësojnë 96% të depozituesve individë. Krahasuar me një vit më parë këto depozita u rriten me 5.5%, dhe numri i depozituesve që mbajnë këto depozita u rrit me 3.3%.

Depozitat e siguruara pjesërisht ( më të mëdha se 2.5 milion lekë) sipas Mamanit,u ulën nga 517.36 miliard lekë që ishin në fund të 2014, në 516.62 miliard lekë në fund të 2015, duke u zvogëluar me 743 milionë lekë.

Bazuar në Ligjin “Për sigurimin e depozitave”, Agjencia siguron deri në 2.500.000 Lekë depozitat e individëve në çdo institucion bankar i cili është anëtar i skemës së sigurimit. Agjencia, gjithashtu,
siguron deri në 2.000.000 Lekë depozitat e individëve në çdo shoqëri kursim-krediti që është anëtare e skemës së sigurimit.