Maqedonia, vendi i tmerrit për refugjatët nga Siria dhe Afganistani
Siç raportojnë mediat vendase, refugjatët e ardhur kryesisht nga Siria, Afganistani e vende tjera aziatike e afrikane, janë vendosur nëpër xhamitë e Shkupit, duke pritur vendimet e zyrtarëve maqedonas rreth fatit të tyre.
Zbrazëtitë ligjore në vend bëjnë që vendimi për fatin e emigrantëve të shtyhet me muaj, duke i lënë ata në gjendje të mjerueshme nëpër qendrat e mbipopulluara të strehimit dhe në rastin më të keq, në duar e kontrabanduesve.
Së fundmi, mediat kanë raportuar edhe për pakënaqësi dhe protesta të emigrantëve. Ndërkohë, është raportuar se tashmë zyrtarët qeveritarë kanë përgatitur ndryshime ligjore që do të mundësonin që fati i një emigranti të huaj, i cili hyn në Maqedoni, të përcaktohet për një ose dy ditë.
Së fundi, organizata “Mjekë pa kufij” e ka cilësuar Maqedoninë si njërin prej vendeve më të këqija për emigrantët e huaj. Vendi është bërë shesh i tragjedive të shpeshta, ku emigrantët shtypen nga treni teksa lëvizin nëpër hekurudhat e vendit, duke pasur synim vendet europiane.
