Ekonomia
Marrëveshja me Emiratet e Bashkuara mbërrin në Kuvend: Pas ratifikimit, fillon ndërtimi i 2 mijë apartamenteve
1 dhjetor/ATSH/ Marrëveshja me Emiratet e Bashkuara për një nga projektet më të mëdha të Rindërtimit pas tërmetit të 26 Nëntorit 2019, me mbi 2000 apartamente për familjet e Durrësit, mbërriti në Kuvend për t’u ratifikuar.
Kryetari i grupit parlamentar të Partisë Socialiste, Taulant Balla u shpreh se “falë angazhimit personal të Kryeministrit Edi Rama, kjo marrëveshje u firmos më 26 nëntor 2020 mes Fondit të Abu Dabit për Zhvillim dhe Ministrit të Rindërtimit, Arben Ahmetaj”.
“Mbi 2000 apartamente tepër cilësore, të cilat me t’u ratifikuar Marrëveshja në Kuvend, fillon puna për ndërtimin e tyre, janë dhuratë nga Sheiku Mohamed bin Zayed bin Sultan al Nahyan, Princi i Kurorës së Abu Dhabit dhe Zëvendës Komandant Suprem i Forcave të Armatosura të EBA për popullin shqiptar dhe qytetin e Durrësit”, tha Balla.
Gjithashtu, ai theksoi se “është dakordësuar edhe përfshirja e Emirateve të Bashkuara në zhvillimin e Durrësit, fillimisht dhe disa zonave të tjera në vazhdim, përmes investimeve direkte në projekte të mëdha, në radhë të parë në turizëm, por jo vetëm”.
“Pyetjeve pa kuptim se pse u desh kaq kohë për këtë marrëveshje, u themi se kjo është një Marrëveshje e Madhe për Rindërtimin, e negociuar dhe e firmosur në kohë rekord. Fondi i Abu Dabit për Zhvillim, edhe pse në kushtet e pandemisë botërore, është dëshmitari i kohës dhe efektivitetit të Qeverisë shqiptare në përgatitjen e kësaj Marrëveshje”, tha ai.
Balla tha se “qeveria shqiptare do të financojë nga ana e saj të gjithë infrastrukturën komunitare të lagjes së re në Spitallë, ndërsa sipërmarrësi i mirënjohur i botës arabe, Mohamed Alabbar, krijuesi i Burj Khalifa godina më e lartë e Dubait, do të realizojë qoftë banesat e Spitallës dhe qoftë banesat e reja që do të ndërtohen në vend të pallateve të shembura në Durrës nga goditja e 26 nëntorit 2019”.
