Ministri Salla në Kavajë: Shqipëria nis eksportin e vezëve “Kategoria A”, pas dakordësimit me BE

Ministri i Bujqësisë dhe Zhvillimit Rural, Andis Salla, gjatë një vizite në një pulari në Kavajë, bëri të ditur se Shqipëria ka nisur eksportin e vezëve të “Kategorisë A”, pas dakordësimit me Bashkimin Europian.

Ai theksoi se ky është një hap i rëndësishëm për sektorin e shpendarisë dhe për rritjen e eksporteve bujqësore, duke u bazuar në përmbushjen e standardeve më të larta të sigurisë ushqimore, gjurmueshmërisë dhe mirëqenies së kafshëve.

Salla u shpreh se tashmë prodhuesit shqiptarë kanë mundësi reale për të hyrë në tregjet ndërkombëtare, duke eksportuar produkte cilësore që plotësojnë kriteret e BE-së.

Ai njoftoi gjithashtu hapjen e aplikimeve për mbështetje financiare nga AZHBR, duke ftuar fermerët dhe sipërmarrësit të aplikojnë për skemat mbështetëse që synojnë rritjen e kapaciteteve prodhuese dhe forcimin e konkurrueshmërisë së Shqipërisë në tregjet e huaja.

Vizita në fermën “Veza Savio” në Kavajë, e themeluar nga dy mjekë veterinerë, Sandri dhe Viola, u konsiderua si një shembull konkret i zhvillimit sipas standardeve të Bashkimit Europian.

Ferma, e cila nisi në vitin 2018 me rreth 12,000 shpendë dhe sot ka arritur në 40,000, operon me cikël të mbyllur prodhimi, duke garantuar kontroll të plotë të çdo hallke dhe produkte cilësore për konsumatorin.

Nisja e eksportit të vezëve të “Kategorisë A” u përshëndet edhe nga Kryeministri Edi Rama, i cili e cilësoi si një arritje të rëndësishme për bujqësinë shqiptare dhe një dëshmi të qartë se vendi po ecën me hapa konkretë drejt integrimit europian.

Rama theksoi se eksporti i vezëve të “Kategorisë A” është një tregues i përkushtimit të Shqipërisë për të përmbushur standardet e BE-së dhe për të rritur rolin e saj në tregjet ndërkombëtare.

 

View this post on Instagram

 

A post shared by Edi Rama (@ediramaal)

/rtsh.al/

The post Ministri Salla në Kavajë: Shqipëria nis eksportin e vezëve “Kategoria A”, pas dakordësimit me BE appeared first on RTSH.