Masa të forta sigurie para nisjes së seancës për votimin e Presidentit. Opozita nis protestën
Masa të forta sigurie në Kuvendin e Kosovës para nisjes së seancës së sotme, ku pritet të votohet presidenti i ri i vendit. Kandidatët janë Hashim Thaçi dhe Rafet Rama.
Të gjithë deputetët i janë nënshtruar një kontrolli të imtësishëm në hollin e Kuvendit dhe karriket e sallës së Kuvendit u kontrolluan një për një nga dy policë civilë.
Mësohet se deputetët e arrestuar të opozitës do të lejohen në seancën e sotme të Kuvendit të Kosovës. Të pranishëm në sallën e Kuvendit janë edhe përfaqësues të trupit diplomatik.
Pa nisur ende seanca e Kuvendit për zgjedhjen e Presidentit, pranë selise së PDK-së në Prishtinë janë mbledhur dhjetëra simpatizantë të Hashim Thaçit, kandidatit për president, kryetar i kësaj partie.
Njësitë speciale kanë bllokuar rrugën që të çon nga kjo seli në sheshin “Nëna Terezë”, ku janë grumbulluar protestuesit e opozitës. Për disa minuta ka pasur një përplasje verbale mes dy palëve dhe parrulla kundër dhe pro Thaçit.
Ka nisur ndërkohë protesta e opozitës së bashkuar kundër marrëveshjeve me Serbinë. Protestuesit e opozitës kërkojnë shpërndarjen e Parlamentit dhe zgjedhje të reja. Opozita po proteston edhe kundër zgjedhjes së Hashim Thaçit president.
Policia shmangu një përplasje mes mbështetësve të opozitës dhe atyre të Thaçit.
