Masakra, lirohet Ballcaj. Xhuvani dhe Sida: Nuk mbaj mend asgjë
Lirohet një prej të arrestuarve e masakrës së ndodhur mëngjesin e djeshëm, me pasojë vrasjen e 4 personave. Burimet thonë se Albano Ballcaj, nuk ka lidhje me krimin dhe gjatë hetimeve nuk janë gjetur elementë që e përfshijnë të riun në vrasje.
Ai është djali i tezës së njërit prej viktimave, 19-vjeçarit, Arbër Demiraj, djalit të ish-prokurorit Skënder Demiraj. Ballacaj ka qenë në lokal së bashku me viktimën për të kaluar momente argëtimi në lokalin e natës “Ante Grand’, që ndodhet në rrugën e Elbasanit, pranë shkollës së Gjuhëve të Huaja.
Me lirimin e Albano Ballcaj, ngushtohet rrethi i të dyshuarve, që kanë marrë pjesë në ekzekutimin e 4 personave. Paraprakisht thuhet se, djali i deputetes Luiza Xhuvani, Konstandin Xhuvani dhe Erald Sida, janë autorët kryesorë të vrasjeve. Ata kanë thënë përpara grupit hetimor se nuk mbajnë mend asgjë në lidhje me atë që ka ndodhur dhe që nuk pranojnë autorësinë e krimit.
Viktimat e masakrës së djeshme janë Arbër Demiraj, 19 vjeç, Edison Jaho, 36 vjeç, Enea Xhaj, 38 vjeç, Giampaolo Azzolo, shtetas italian, 60 vjeç. Krimi është regjistruar rreth orës 04:00 të mëngjesit të së martës dhe brenda pak minutave policia arrestoi Konstandin Xhuvanin, 25 vjeç, shoku i ngushtë i tij Erald Sida, 24 vjeç dhe Albano Ballcaj, 19 vjeç. Ky i fundit u liria mëngjesin e sotëm.
