Meta: Aksi rrugor Çorovodë – Përmet, mundësi e mirë për zhvillim

Autoriteti Rrugor Shqiptar prezantoi projektin për aksin rrugor Çorovodë – Përmet, ku i pranishëm ishte edhe kreu i Kuvendit, Ilir Meta.

Në fjalën e tij, kryeparlamentari Meta vlerësoi projektin si një mundësi e mirë për të rritur turizmin. Sipas Metës, ndërtimi i këtij aksi rrugor i jep fund izolimit të Skraparit.

“Kjo rrugë lidh dy lugina, të Osumit dhe të Vjosës. Bashkon dy kryeqendra të trashëgimisë kulturore në Berat dhe Gjirokastër. Është një mundësi e mirë për të rritur turizmin dhe agrobiznesin, blegtorinë dhe agropërpunimin”, deklaroi Meta.

Është një projekt shumë i rëndësishëm dhe ka nevojë për transparencë maksimale si dhe konsultim me qytetarët, tha Meta, duke shtuar se projekti duhet të zbatohet me standard maksimal dhe me kosto sa më të ulët.