Ministria e Kulturës ndan çmimet për fushën e muzikës

Në Ministrinë e Kulturës, Rinisë dhe Sportit të Kosovës u  zhvillua sot ndarja e çmimeve në fushën e muzikës, ku profesoreshat e muzikës Seniha Spahiu dhe Sevime Gjinali u nderuan me Çmimin për vepër Jetësore për muzikë “Niketë Dardani” për vitin 2015.

Në ceremoninë e organizuar me këtë rast ishte i pranishëm ministri i Kulturës, Kujtim Shala, artiste, etj.

Kurse, me çmimet vjetore në fushën e muzikës janë nderuar veprat e kompozitorëve Dafina Zeqiri- Nushi për “Fantazia e Fuga” për duo pianistik, Mendi Mengjiqi për “Suitë shqiptare për orkestër harqesh”, Kreshnik Aliçkaj për “Koncert për violinë e piano e orkestër” si dhe Drinor Zymberi për “Cantata Metamorphosis” për solistë, kor e orkestër.

Çmimet në këtë fushë ndahen në bazë të Rregullores së Ministrisë për dhënien e Çmimit Kombëtar për Veprimtari Jetësore “Niketë Dardani” dhe çmimeve për vepra muzikore dhe kanë vlera financiare.

Ndërsa, çmimet nga fusha e kinematografisë do të ndahen në një ceremoni tjetër të veçantë në 10 qershor. Çmimi për Vepër Jetësore në fushën e kinematografisë “Bekim Fehmiu” i jepet  aktorit Bislim Muçaj. Ndërsa, çmimi vjetor për kinematografi produktorit (producentit) të filmit “Shok”, Eshref Durmishit.

Juria profesionale për çmimet për në fushat e muzikës përbëhej nga akademiku Zeqirja Ballata, kompozitorit Valton Beqiri dhe Baki Jasharit, kompozitor dhe dirigjent.

Ndërsa juria profesionale që ka vlerësuar çmimet për kinematografi përbëhej: Xhevat Qorraj, aktor, Isa Qosja, regjisor, Menduh Nushi, kameraman, Igballe Qena, aktore dhe Jahi Jahiu, dramaturg.